For the old Jamaicans among us

Memba wen yu a come fram school and stop fi pick Mass John cherry off im cherry tree and dawg run yu dung.

Memba wen yu madda sen yu fi tek the clothes fram aff a di line but yu wait til night den yu fraid fi go by yuself.

Memba wen yu fraid fi go a shop by yuself a night because Miss Matty jus' dead and yu tink yu might si her duppy.

Memba wen yu and yu frien dem decide seh unu a go run a boat, the biggest cart wheel dumplin yu eva si.

Memba wen coming fram school ina di rain and yu tek off yu shoes and walk barefoot all the way home a race board horse
inna di gutter water.

Memba wen dem use fi gi weh free milk powder and bulga rice a school, an' yu play milk powder war all the way home.

Memba wen dem good rice and peas and chicken Sunday dinna with a nice refreshing glass a carrot juice.

Memba wen yu 'ave roast breadfruit and ackee and salt fish breakfast jus' barely a day afta yu Saturday Peas soup wid
cho-cho, turnip, carrot an'punkin.

Memba wen teacha beat yu because yu neva do yu homework.

Memba marning time wen yu reach a school jus in time fi devotion and yu betta mek sure yu ave yu hym book and yu bible, yu pleat dem betta in order and yu khaki well starch.

Memba dem good ole starch uniform ( coudda stan up by demself ) and yu nice shine brown or black shoes.

Memba when yu madda use fi seh "Go pick a switch mek a beat yu".

Memba Christmas time wen everybody a mek a suit fi gran market night, mama stay up a bake cake, draw sorrell, cook curry goat, don't figet the case a D&G soda and red stripe beer weh unda the bed.

Memba when a guinep seed fly dung yu throat and smaddy 'ave fi lick yu back fi mek it fly back up.

Memba when yu swallow chewing gum & dem seh yu ago ded cause it ago tie up yu tripe.

Memba a come fram school and stap fi get the last piece a Miss Brown toeto and a suck suck.

Memba dem seh nuh buy nuh sky juice fram Mr. Tom because im ave sore foot.

Memba when dem seh nuh buy bun & cheeze from juicie cause him use di knife cut & clean him toenail.

Memba saving part a lunch money fi buy ice cream fram creamy weh come pan Sunday.

Memba a fling stone fi lick dung ginep and the stone bus yu bredda head.

Memba the peanut man...the jackfruit lady...the orange man...the drumpan man (jerky)?

Memba a play marble wid yu bredren dem.

Memba a go a bush wid yu fadda.

Memba a go undaneat the cellar fi the fowl egg.

Memba a jump rope wid yu frien dem....One two Beeny...lick im mek im feel eh, mek im know yu mean eh, yu mean eh, yu mean eh.

Memba a kick foot ball wid yu frien dem roun' a ball grong.

Memba yu madda sen yu go a shop and yu sing the list all the way deh "one pint milk, one bread, 1 lb a flour. But wen yu reach deh, yu tell the shop keeper yu want "1 pint of bread ,1 pound of milk & a flour.

Memba when yu last yu madda money and yu fraid fi go back home because she might beat yu.

Memba settin up the cock dem fi fight.

Memba all dem good duppy story, and nancy story wi 'ear growing up.

IF YU MEMBA ANY OF THIS, YU OLD FI TRUE!!!